वरिष्ठ साहित्यकार डा. बानिरा गिरीको निधन

काठमाडौं । नेपाली साहित्यमा पिएचडी गर्ने पहिलो महिला स्रष्टा डा. बानिरा गिरीको निधन भएको छ । परिवारका अनुसार उनको हृदयघातका कारण ७५ वर्षको उमेरमा निधन भएको हो ।

२० दिनअघि कोभिड संक्रमण भएको बानिरालाई हृदयघात भएपछि नयाँ बानेश्वरस्थित सिभिल अस्पतालमा लगिएको थियो । उनको आइतबार राति १० बजे निधन भएको हो । अस्पताल पुर्‍याउनासाथ डाक्टरले मृत घोषणा गरेका थिए । उनी तीन वर्ष अघिदेखि अल्जाइमर्स रोगबाट पनि पीडित थिइन् ।

भारतको दार्जिलिङमा जन्मिएकी बानिकाले त्रिभुवन विश्वविद्यालयबाट कवि गोपालप्रसाद रिमालको काव्यहरूमाथि सोध गरी ‘गोपालप्रसाद रिमालका काव्यमा स्वच्छन्दतावाद’ विषयमा विद्यावारिधि गरेकी थिइन् ।

उनको ‘एउटा जिउँदो जङ्गबहादुर’, ‘जीवनः थामहरू’, ‘शब्दातीत शान्तनु’ र ‘काठमाडौं काठमाडौं’ कविता संग्रह, ‘कारागार’, ‘निर्बन्ध’ उपन्यास, ‘मेरो आविस्कार’ आत्मकथा, ‘रोकिनेले आकार दिन सक्दैन’ यात्रा संस्मरण र ‘पर्वतको अर्को नाम’ तथा ‘पार्वती र जंगल जंगल’ निबन्ध प्रकाशित छन् ।

उनको श्रीमान, एक छोरा र एक छोरी छन् ।

प्रतिक्रिया दिनुहोस्